इटहरी / इटहरी २ मा हात्ती आक्रमणमा परी स्थानीय २६ वर्षीय रविन खड्काको मृत्यु भएपछि स्थानीयबासी शोकमा डुबेका छन् । इटहरी २ बुढासुब्बा चोक नजिकै बुधवार राति ९ बजेतिर हात्ती आक्रमणबाट खड्काको मृत्यु भएको थियो ।
मृतकका बुबा मधु खड्काका अनुसार रातको समयमा बाक्लो मात्रामा आएका हात्तीको बथान खेदाउन जाने क्रममा हात्तीले आक्रमण गरेको हो । ‘घरको जेठो छोरा हो, घर चलाउने उमेरमै गुमाउनु¥यो,’ उनले शोकमिश्रित मुद्रामा भने, ‘गाउँका सबैजना जाँदा जानैप¥यो । घर, गाउँमा हात्ती पस्न नदिनका लागि खेदाउन जाँदा नसोचेको घटना भयो ।’
दुई छोरा, तीन छोरी रहेको र जेठा छोरा रहेका रविनको हात्ती आक्रमणबाट ज्यान गुमाउनुपर्दा आफूहरू केही सोच्नै नसकेको बताए ।
दुई वर्ष वैदेशिक रोजगार (साउदी अरब) मा काम गरेर अघिल्लो वर्ष पुसमा मात्रै आएका रबिन फेरि दुबई जाने तयारीमा थिए ।
उक्त घटना भएपछि बाबु मधु, आमा कमला खड्का र मृतककी श्रीमती रेणुका राईसहित इटहरी २ नं. वडावासी नै शोकमा डुबेका छन् ।
‘घरबाट नजा भनेर भने पनि गाउँले सबै गएपछि गएको थियो,’ शोकाकुल आमाले भनिन्, ‘हात्तीको हुल नै थियो । हात्ती गाउँ पस्ला भन्ने डर भयो, हात्ती धपाउन गएको छोरालाई हात्तीले नै लग्यो ।’
हात्ती धपाउन रातभर जाग्राम
पाँच दिनयता हात्तीको बथान आएपछि हात्ती धपाउन रातभर जाग्राम बस्नुपरेको स्थानीयबासीको भनाइ छ । स्थानीय रोशन अधिकारीले हात्ती धपाउन आफूहरू रातभर जाग्राम बस्नुपरेको उनले बताए ।
‘साँझ साढे ५ बजेदेखि नै हात्तीको समूह आउँछ । हात्ती धपाउन हामी गाउँभरका मान्छे रातभर जाग्राम बस्छौँ,’ उनले भने, ‘यो जाडो मौसममा त रातभरि बस्दा दाउराको जोहो गर्न पनि समस्या छ ।’ रातभर जाग्राम बस्दा दाउराको समस्या हुने उनले बताए ।
आफूहरूले हरेक वर्ष हात्ती धपाउन रातभर जाग्राम बस्नुपर्ने उनको भनाइ छ । ‘झापाको बाहुन डाँगीजस्तै हात्तीको बथान आउन थालेपछि समस्या भएको छ । सङ्घीय, प्रदेश र स्थानीय तहले हात्तीको समस्या समाधान गर्नका निम्ति पहल गर्नुपर्छ,’ उनले भने, ‘साँझ पर्ने बित्तिकै हात्ती आउँछ । यस वर्ष २६ वटा हात्ती आएका छन् ।’
इटहरीमा हात्तीको दीर्घकालीन समस्या समाधान खोज्न सम्बन्धित क्षेत्रले चासो देखाउनुपर्ने उनको भनाइ छ । हात्तीलाई गाउँमा पस्न नदिनका लागि सुरक्षाकर्मी, वन रक्षक लगायतको साथ आवश्यक पर्ने उनले बताए ।
समस्या समाधान गर्न सर्वदलीय बैठक बस्दै
हात्ती आक्रमणबाट मृत्यु भएपछि सर्वदलीय बैठक बस्ने तयारी भएको छ । घटनास्थलमा आएका इटहरी उपमहानगरपालिकाका मेयर हेमकर्ण पौडेलले तत्काल समस्याको समाधानका निम्ति पहल गर्ने बताए ।
सामुदायिक वनका कर्मचारीले वास्ता नगरेको स्थानीयले गुनासो गरेपछि मेयर पौडेलले जिल्ला वन प्रमुख, प्रमुख जिल्ला अधिकारी, प्रहरी प्रमुख, सशस्त्र प्रहरी प्रमुखसहित कोसी प्रदेशका मुख्यमन्त्री केदार कार्की लाईसमेत समस्या राखेका छन् । उक्त समस्यापछि आज (बिहीबार) दिउँसो सर्वदलीय बैठक बस्ने मेयर पौडेलले बताए ।
स्थानीय तहसँगै संयन्त्रै छैन
हात्तीको समूहलाई नियन्त्रण लिन वा धपाउनका निम्ति स्थानीय तहसँग कुनै संयन्त्र नभएको मेयर पौडेलले बताए ।
‘हात्तीको आक्रमणबाट जोगाउनका निम्ति स्थानीय तहसँग कुनै संयन्त्र छैन,’ उनले भने, ‘वन कार्यालयसँग समन्वय गरेर के गर्न सकिन्छ, त्यसबारे निर्णय गर्छौँ ।’ उनले हात्ती नियन्त्रण गर्नका निम्ति आफूहरूसँग कुनै संयन्त्र नभएको बताउँदै साइरन जडान, बत्ती जडानजस्ता कुरामा भने उपमहानगरले काम गरिरहेको बताए ।
पीडित परिवारलाई एक लाख दिने
हात्ती आक्रमणमा परी मृत्यु भएका पीडित परिवारलाई उपमहानगरले एक लाख रुपैयाँ दिने भएको छ ।
‘मानिसको ज्यानभन्दा पैसा ठुलो होइन, तर तत्कालका लागि उपमहानगरले एक लाख रुपैयाँ दिने वचन दिन्छु,’ मेयर पौडेलले भने, ‘हात्तीबाट इटहरीका जनता जोगाउनका निम्ति वन कार्यालयसहित सबै क्षेत्रको संयन्त्र प्रयोग गरिनेछ ।’ यो पनि पढनुस….
इटहरीमा हात्तीको आक्रमणबाट एक युवकको मृत्यु
Discussion about this post