इटहरी : उदयपुरको वेलका नगरपालिका ९ को चुनावी नतिजा आएसँगै कोशी प्रदेशमा भएका सबै उपचुनावको मतगणना सम्पन्न भएको छ । त्यहाँ सम्पन्न भएको मतगणनाको अन्तिम परिणाम अनुसार नेकपा माओवादी केन्द्रका उम्मेदवार भरत घिमिरे विजयी भएका छन् ।
२०७९ को निर्वाचनमा काँग्रेसले जितेको सो वडामा उपनिर्वाचनमा काङ्ग्रेस तेस्रो स्थानमा खुम्चिन पुगेको छ। काङ्ग्रेस उम्मेदवार नवीन बस्नेत तेस्रो हुँदा एमाले उम्मेदवार मोहन खड्का दोस्रो भए ।
माओवादी केन्द्रले उदयपुर कै त्रियुगा नगरपालिका १२ को वडा अध्यक्षमा पनि जीत हासिल गर्यो । त्यहाँका उम्मेदवार नवीन कुमार बान्तावाले एमालेका लक्ष्मी नारायण चौधरीलाई पराजित गरे ।
२०७९ को निर्वाचनमा पहिलो भएको काँग्रेस यहाँ पनि तेस्रो स्थानमा पुगेको छ । चुनावअघि ग्रामथानका स्थानीय चौक चौतारोमा बसेर कुराकानी गरिरहेका हुन्थे, ‘यो पटक त्रिपक्षीय भिडन्त हुन्छ जस्तो छ ।’
चुनावअघि ग्रामथान पुग्दा त्यहाँका स्थानीय स्थानीय ज्ञान चन्द्र गच्छदारले भनेजस्तै मुख्यरुपमा नेपाली काँग्रेस, नेकपा एमाले र नेकपा माओवादी केन्द्रबिच प्रतिस्पर्धा भयो । तर बाजी भने नेकपा माओवादी केन्द्रका उम्मेदवार नमोनारायण माझीले मारे ।
यसअघि २०७९ का साथै २०७४ सालको निर्वाचनमा समेत अध्यक्ष जीतेको काँग्रेसको किल्ला तोड्दै आफ्ना उम्मेदवार निर्वाचित भएपछि नेकपा माओवादी केन्द्रका नेताहरूमा उत्साह पैदा भएको छ ।
कोशी प्रदेशको एक मात्र पालिकामा भएको पालिका अध्यक्ष साथै उदयपुरका दुवै वडाका अध्यक्ष जीतेपछि आफ्नो पार्टीले विजय हासिल गरेपछि नेताहरूले माओवादीप्रति जनताको समर्थन बढेर गरेको उल्लेख गरिरहेका छन् ।
यसरी आठ ठाउँको निर्वाचनमा तीनमा जित हासिल गरेर पहिलो भएको माओवादी केन्द्रले कोशी प्रदेशमा आफ्ना जनप्रतिनिधिको सङ्ख्या समेत बढायो ।
कोशी प्रदेशका निर्वाचन भएका स्थानमा माओवादी केन्द्रका उम्मेदवार २०७४ सालको निर्वाचनमा निर्वाचित भएका थिएनन् । यस्तै ताप्लेजुङको सिरिजंगा गाउँपालिका ३ मा भएको उपनिर्वाचनमा माओवादी केन्द्रका उम्मेदवार दोस्रो भए । त्यहाँ एमालेका कुमारी साम्देम्बाले निर्वाचन जित्दा २०७९ को निर्वाचनमा पहिलो भएको काँग्रेसका उम्मेदवारले तेस्रो स्थान हासिल गरेका छन् ।
सुनसरीको गढी गाउँपालिका ६ मा पनि नेकपा माओवादी केन्द्रका उम्मेदवार दोस्रो भएका छन् । त्यहाँ काँग्रेसका उम्मेदवार तेतर साहूले निर्वाचन जित्दा २०७९ को निर्वाचनमा पहिलो भएको नेकपा एमालेले तेस्रो स्थान हासिल गरेको छ ।
तेह्रथुमको लालीगुराँस नगरपालिका वडा नं. ८, ओखलढुङ्गाको मोलुङ गाउँपालिका ५ र झापाको कनकाई नगरपालिका ६ मा भने माओवादीका उम्मेदवार चौथो स्थानमा छन् । त्यहाँ क्रमशः २०७९ को निर्वाचनमा जीत सुरक्षित गर्दै काँग्रेसका नगेन लिम्बु, २०७९ को निर्वाचनमा काँग्रेसको जीतको बदला लिँदै एमालेका गङ्गा बहादुर तामाङ र २०७९ को निर्वाचनमा एमालेले जितेकोमा स्वतन्त्र उम्मेदवार लक्ष्मी प्रसाद ओली निर्वाचित भएका छन् ।
यसरी हेर्दा कोसीमा जम्मा आठ स्थानमा भएको निर्वाचनमा माओवादी केन्द्रले तीन ठाउँमा निर्वाचन जित्दै पहिलो भएको छ भने । एमाले र काँग्रेसले समान दुई-दुई र स्वतन्त्र उम्मेदवारले एक स्थानमा जीत हासिल गरेका छन् ।
समग्र रूपमा माओवादीले स्थानीय तहमा आफ्नो उपस्थिति बढाएको छ । नेकपा एमालेले बराबरीमा रोकिदा सङ्ख्या नेपाली काँग्रेसले तीन स्थान गुमाएको छ ।
Discussion about this post