झापा : कोशी प्रदेशका पूर्व मुख्यमन्त्री उद्वव थापामाथि आक्रमण भएको छ । नेपाली कांग्रेस कोशी प्रदेश सभापतिसमेत रहेका थापामाथि शनिबार आक्रमण भएको हो ।
झापाको कन्काईस्थित दोमुखा क्षेत्रमा नेपाल प्रेस युनियन झापाको साधारणसभामा सहभागी भएर फकिँदै गरेका थापामाथि जामुनबारी चोकस्थित जुकेखाडी नजिकै आक्रमण भएको हो ।
थापासँगै गाडीमा सवार रहेका कांग्रेस झापा सचिव कृष्ण हुमागाईंका अनुसार आज (शनिबार) साँझ साढे ५ बजेतिर थापामाथि आक्रमण भएको हो ।
‘हामी साधारणसभाबाट फर्किदैँ थियौँ,’ हुमागाईँले फोन सम्पर्कमा प्रदेश खबरसँग भने, ‘बाटोमा गाडीले छेकिरहेपछि साइड दिनका लागि रिक्वेस्ट गर्यौँ । साइड नदिएपछि हामी साइड लिएर अगाडि बढिरहेका थियौँ, अचानक स्पीडमा ल्याएर अगाडि बाटो छेके ।’
हुमागाईँका अनुसार बा १ झ ६५३ नं को गाडीमा सवार रहेका थापामाथि बा १ ञ १८७० का चालक भक्त कटवालले आक्रमण गरेका हुन् । पुनः बाटो छेकेपछि साइड दिन आग्रह गरेको भएपनि कटवालले बक्सिङले हिर्काएका थिए । कटवाल झापाकै शिवसताक्षी ११ निवासी रहकेको बताइएको छ ।
दाहिने हातको बक्सिङले हिर्काउँदा थापाको देब्रे आँखाको माथिपट्टी चोट लागेको छ । ‘के कारण र किन हातपात गरेको भन्ने नखुलेपनि ती मानिसमा केही समस्या देखिन्छ,’ हुमागाईँले भने, ‘त्यसलगत्तै प्रहरीले नियन्त्रणमा लिएको छ ।’
हातपातपछि नेता थापा उपचारका लागि बिर्तासिटी अस्पताल गएका थिए । अस्पतालमा सामान्य उपचारपछि उनी अहिले घर फर्किएका छन् । ,
पक्राउ परेका कटवालमाथि थप अनुसन्धान सुरु गरिएको प्रहरीले जनाएको छ ।
Discussion about this post