धरान । धरानमा जारी विजनेश एक्स्पो धरानको पहिलो दिन आज राजेश पायल राईको एकल प्रस्तुति हुने भएको छ ।
शनिवार दिउँसो १ बजेदेखि जारी एक्स्पोमा साँझ ८ बजे राई इज किङको उपनामले ख्याति कमाएका राजेश पायल राईले एकल प्रस्तुति हुने छ ।
राजेश पायल राईको सबैभन्दा बढी फ्यान रहेको पूर्वको सहर मध्ये धरान एक नम्बरमा आउँछ । धरान भनेपछि हुरुक्कै हुने राईले पछिल्लो एक वर्षयता धरानमा एकल प्रस्तुति दिने समय पाएका थिएनन् ।
भर्सटायल गायक राई स्टेजका पनि किङ नै मानिन्छन् । धरानमा हुने राजेश पायल राईका सबै कार्यक्रमहरूले दर्शकहरूको साथ पाउँदै आइरहेको छ ।
साङ्गीतिक सङ्घर्षका सुरुवाती दिनहरू धरानबाटै थालेका राई करिब साढे तीन दशक नेपाली गीत सङ्गीतको शीर्षस्थानमा राज गरिरहेका छन् ।
आज एक्स्पोको उद्घाटनका दिन राईले मैले मायाले दिएको चिनो लगायत उनका पछिल्लो चर्चाको शिखरमा रहेका दर्जनौँ गीतहरूबाट एक्स्पोमा आउने आगन्तुकहरूलाई मनोरञ्जन दिलाउनेछन् ।
धरानको व्यापार व्यवसायलाई चलायमान बनाउन र स्थानीय व्यापारिक उत्पादनलाई प्रवर्धन गर्दै धरानको आन्तरिक पर्यटनलाई वृद्धि गर्ने उद्देश्य सहित विजनेश एक्स्पो धरान २०८१ प्रारम्भ गरिएको नेपाल उद्योग तथा व्यवसायी महासङ्घ धरानका अध्यक्ष शिवराज श्रेष्ठले जानकारी दिए ।
एक्स्पो फागुन १० गतेसम्म सञ्चालन हुने पनि श्रेष्ठले बताए ।
Discussion about this post