एक भए जनमुक्ति, सङ्घीय लिम्बुवान र लिम्बुवान राष्ट्रिय समिति

इलाम / तीन पार्टी बिच एकता भएको छ । राष्ट्रिय जनमुक्ति पार्टी, सङ्घीय लिम्बुवान पार्टी नेपाल र लिम्बुवान राष्ट्रिय समितिबिच एकता भएको हो ।

नेपाल जनमुक्ति पार्टीका अध्यक्ष केपी पालुङ्वाले विचार र मुद्दा मिल्ने तीन पार्टीबिच एकीकरण भएको बताए । तीन पार्टी एकीकरण भई ‘नेपाल जनमुक्ति पार्टी (नेजपा)’ गठन भएको छ ।

पहिचानको मुद्दालाई स्थापित गर्न एक भएको उनको भनाई छ ।

हालसम्म प्राप्त भएका उपलब्धिको रक्षा गर्दै संविधान संशोधनसहित पुनः लेखन गर्न दबाबमूलक कार्यक्रम अगाडी बढाउने उनले बताएका छन् ।

छ बुँदे सहमतिका साथ बनेको नेपाल जनमुक्ति पार्टीको निर्वाचन आयोगमा ९९ नम्बरमा दर्ता भएको नेजपाका नेता सञ्जुहाङ पालुङ्वाले बताए ।

ठुला दलले बेवास्ता गर्दा पहिचानको मुद्दा ओझेलमा परेकाले तीन पार्टी एकीकृत भएर सो मुद्दा पुनः उठाउने बताइएको छ ।

पार्टीका उपाध्यक्ष भक्त खेवाङले पहिचानको मुद्दालाई जातिवादी हिसाबले अपव्याख्या गरिएको गुनासो गरे ।

पहिचानबारे धेरैलाई थाहा नभएको भन्दै उनले सबै जातजाति, भूगोल, भाषाभाषी र इतिहासको कुरा नै पहिचान भएको उनले बताए ।

तीन पार्टीबिच २०८० मङ्सिर १९ गते तीन बुँदे सहमति भई पार्टी एकता घोषणा भएकामा गत वैशाख २९ र ३० गते सम्पन्न राष्ट्रिय जनमुक्ति पार्टीको विधान महाधिवेशनले सहमति अनुमोदन गत जेठ २९ गते निर्वाचन आयोगमा अद्यावधिक गरिएको थियो ।