विराटनगर : आन्तरिक शक्ति संघर्षमा जुधिरहने नेपाली कांग्रेसभित्रको कलह पुनः उत्कर्षमा पुगेको छ ।
मंगलबार विराटनगरमा कांग्रेस नेता डा. शेखर कोइरालाको अगुवाइमा कोशी प्रदेशभित्रका आफ्ना समूहका पालिकाका सभापतिहरूको भेला जारी छ । जुन कार्यक्रमलाई पार्टी केन्द्रीय कमिटिले भने मान्यता दिएको छैन ।
नेपाली कांग्रेसको केन्द्रीय कार्यालयले आगामी मंसिर २२ गतेयता पार्टीका कुनैपनि कार्यक्रम नरहेको एक पत्रमार्फत प्रष्ट्याएको छ ।
मंसिर २२ गते कोशी प्रदेश कार्यासमितिले पहिलो प्रदेश सम्मेलन आयोजना गर्दैछ । सो कार्यक्रममा पार्टी सभापति एवम् पूर्व प्रधानमन्त्री शेरबहादुर देउवा आउने कार्यक्रम छ । सोभन्दा अघि नै डा. शेखर समूहले विराटनगरमा भेला राखेको हो ।
तर आज (मंगलबार) भइरहेको कार्यक्रम पार्टीलाइ संगठित बनाउनका लागि आवश्यक रहेको नेपाली काङ्ग्रेस विराटनगर महानगर सभापति दीपक चापागाईंले बताए ।
कार्यक्रममा बोल्दै उनले भने, ‘हरेक संकटमा विराटनगर जागेको अवस्था छ । आज काङ्ग्रेस कमजोर भएको अवस्थामा विराटनगरले सन्देश दिन खोजेको छ ।’
दुई दिनसम्म चल्ने सम्मेलनले काङ्ग्रेसको महाधिवेशन समयमै सम्पन्न गर्नुपर्ने, सबै भातृ संस्थाका अधिवेशन गराउनुपर्ने र डा. शेखर कोइरालालाई आगामाी सभापति बनाउनुपर्ने निष्कर्ष निकाल्ने बताइएको छ ।
कार्यक्रममा कोशी प्रदेशका एक सय ३७ स्थानीय तहका पालिका सभापतिममध्ये एक सय बढी सभापतिहरूको सहभागिता रहेको छ ।
कार्यक्रममा नेपाली काङ्ग्रेस मोरङका सबै पालिकाहरू आयोजक रहेका छन् । खासगरी यो भेला डा. शेखरकै इच्छामा राखिएको स्रोतको भनाइ छ ।
Discussion about this post