इटहरी : इटहरीका सामुदायिक विद्यालयमा मेगा किचनले खाजा खुवाउन सुरु गरेको छ ।
गत आर्थिक वर्ष इटहरी उपमहानगरपालिकाले ठेक्का प्रक्रियामार्फत नै विद्यालयमा खाजा खुवाउन टेण्डर आह्वान गरेको थियो ।
तर, चालु आर्थिक वर्ष भने हालसम्म पनि ठेक्का प्रक्रियासमेत सुरु नगरेपछि मेगा किचनले विद्यालयमै सम्झौता गरेर खाजा खुवाउन सुरु गरेको हो ।
मेगा किचन एरिनाको टिफिनले सञ्चालनमा ल्याएको हो । कम्पनीका प्रबन्ध निर्देशक कञ्चन थापाका अनुसार हाल राष्ट्रिय मावि, कविर मावि, कचना मावि, ज्ञानोदय स्कुललगायतका सामुदायिक विद्यालयसँग सम्झौता गरी खाजा खुवाउन थालिएको हो ।
‘संघीय सरकारले दिएको १५ रुपैयाँ र उपमहानगरले दिएको १५ रुपैयाँ गरी ३० रुपैयाँ बराबरको मेन्युसहितको खाजा खुवाउनेगरी विद्यालयसँग सम्झौता भएको छ,’ थापाले भनिन्, ‘हामीले विद्यालय लागेको प्रत्येक दिन खाजा खुवाउँदै आएका छौँ ।’
उनले यसअघि खाजा खुवाउने मनपरी तरिका भएपनि अहिले भने आफूहरूले मेन्युसहित खाजा खुवाउन थालेको बताइन् ।
मेन्युअनुसार आइतबार भेज फ्राई राइस एक सय २० ग्राम, सोमबार मसला मिक्स हलुवा एक सय ८० ग्राम, मंगलबार चना, मटर र चिउरा दुई सय ग्राम, बुधबार खिचडी दुई सय ग्राम, बिहीबार खीर दुई सय ग्राम र शुक्रबार (दुई वटा शुक्रबार) कुखुराको मासु ८० ग्राम, चिउरा र (दुई शुक्रबार) भेज बिर्यानी दुई सय ग्राम खुवाइनेछ ।
पहिलो चरणमा यहाँका केही सामुदायिक विद्यालयहरूलाई लक्षित गरेर यो कार्यक्रम लागू गरिनेछ । कम्पनीकी फुड एडभाईजर आस्मा खुलालकाअनुसार बालबालिकाहरूको स्वास्थ्य, पोषण, र शैक्षिक प्रदर्शन सुधार गर्ने उद्देश्यले मेगा किचन स्थापना गरिएको हो ।
आगामी दिनमा मेगा किचनलाई थप विद्यालयहरूमा विस्तार गर्ने र स्थानीय समुदायलाई यस अभियानमा सहभागी गराउने योजना रहेको उनले बताइन् ।
Discussion about this post