इटहरी : प्रहरीको हिरासतमा रहेकालाई छुटाइदिने भन्दै रकम असुली गर्ने एक जनालाई प्रहरीले पक्राउ गरेको छ ।
लागूऔषध मुद्धाको अनुसन्धानको सिलसिलामा म्याद थप भइ इलाका प्रहरी कार्यालय पकलीको हिरासतमा रहेका प्रतिवादी हेमन विश्वकर्मालाई हिरासतबाट मुक्त गरीदिने र आफूलाई प्रहरी निरीक्षक भन्दै रकम असुली गरेको आरोपमा प्रहरीले एक जनालाई पक्राउ गरेको हो ।
सुनसरी प्रहरीका एसपी सुमन तिम्सिनाका अनुसार इनरुवा नगरपालिका वडा नं. ६ घर बताउने २२ वर्षीय आकाश भन्ने विनोद दाहाललाई पक्राउ गरिएको हो ।
उनले प्रतिवादी हेमनकी आमा लीला विश्वकर्माबाट पटकपटक गरी २५ हजार रकम लिएको र थप १५ हजार भएमा छुट्ने बताएर रकम असुली गरेका थिए ।
यसबारे पीडितले प्रहरीमा उजुरी दिएपछि दाहाललाई रामधुनी नगरपालिका वडा नं. ५ स्थित लगौना मोडबाट रकम लिदैँ गरेको अवस्थामा पक्राउ गरिएको एसपी तिम्सिनाले जानकारी दिए ।
रकमसहित पक्राउ परेका उनको साथबाट १५ हजार र दाहालले प्रयोग गर्ने मोबाइल एक थान बरामद गरी पक्राउ गरिएको हो ।
पक्राउ परेका उनीविरूद्ध प्रहरीले जिल्ला अदालत सुनसरीबाट सोमबार सात दिनको म्याद थप गरी ठगी कसुरमा अनुसन्धान गरिरहेको सुनसरी प्रहरीले जनाएको छ ।
Discussion about this post