सिन्धुपाल्चोकमा जन्ती बोकेको बस दुर्घटना, ३ जनाको मृत्यु (नामावली सहित)

दोलखा । दोलखाबाट बिहे लिएर सिन्धुपाल्चोक जाँदै गरेको बस दुर्घटना हुँदा ३ जनाको घटना स्थलमै मृत्यु भएको छ ।

शुक्रबार बिहान भिमेश्वर नगरपालिका–१ सुष्पाक्षमावतिबाट छुटेको बा ४ ख ५६१६ नम्बरको जन्ती बोकेको बस दुर्घटना हुँदा ३ जनाको मृत्यु भएको दोलखा प्रहरीले जनाएको छ ।

सिन्धुपाल्चोकको त्रिपुरासुन्दरी गाउँपालिका वडा नम्बर ४ स्थित पिस्कर जान लागेको उक्त जन्ती बस शुक्रबार बिहान साढे सात बजे दुर्घटना भएको जिल्ला प्रहरी कार्यालय दोलखाले जनाएको छ ।

जिल्ला प्रहरी कार्यालय सिन्धुपाल्चोकका सूचना अधिकारी डिएसपी निरञ्जन भट्टराईका अनुसार बसमा बेहुलासहित ५५ जन्ती सवार रहेको बताए। मृत्यु हुनेहरुमा भीमेश्वर नगरपालिका १ दाेलखाका मानबहादुर थामी, दिपेन्द्र थामी र शिव श्रेष्ठ रहेको प्रहरीले जनाएको छ । बेहुलासहित बाँकी सबै ५२ जना घाइते भएका छन्।

घाइतेमध्ये ७ को अवस्था जटिल छ। उनीहरुलाई खाडिचौरस्थित सिन्धु सदाबहार अस्पताल ल्याएर उपचार सुरु गरिएको छ। उनीहरुको अवस्था हेरेर चिकित्सकले अन्यत्र रेफर गर्न सक्ने प्रहरीले जनाएको छ।

सामान्य ४५ जना घाइतेको त्रिपुराकै विभिन्न स्वास्थ्य संस्थामा उपचार जारी रहेको डिएसपी भट्टराईले जानकारी दिए। सामान्य घाइते उपचारपछि घर फर्कँने क्रमसमेत सुरु भएको उनले बताए। जन्ती बस दोलखाको भीमेश्वर नगरपालिका–१ बाट आएकाले अधिकांश घाइते त्यहीँका छन्। केही घाइते आसपासका गाउँका रहेका छन्।

जन्तीहरु स्वस्थानी तामाङ, प्रकाश तामाङ, ज्ञानबहादुर तामाङ, दलबहादुर तामाङ, सिँहबहादुर लामा, इश्वर थामी, लक्ष्मण थामी लगायत घाइते भएका हुन्। घाइते अधिकांशको टाउको, ढाड र हातखुट्टामा चोट लागेको प्रहरीले जनाएको छ। बसका चालक पनि घाइते छन्।

घटनास्थल बाह्रविसे बजारबाट २५ किलोमिटर दक्षिणतर्फ पछ । रोल्वालिङ यातायातको जन्ती बोकेको उक्तबस कच्ची र साँघुरो सडकबाट सय मिटर तल खसेको थियो।