विराटनगर / प्रतिपक्षी दल राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले देश ठुलो कि जीबी राई ? भन्दै गृहमन्त्री रवि लामिछानेलाई प्रश्न गरेका छन्।
जीबी राईलाई जतिसक्दो चाँडो पक्राउ गर्न उनले गृहमन्त्रीलाई आग्रह गरे। उनले आकाशमा वा पातालमा जहाँ भए पनि पक्रिने भनेको कुरा कहाँ पुग्यो ? भनेर गृहमन्त्रीलाई प्रश्न गरे ।
मङ्गलवार प्रतिनिधि सभा बैठकको आकस्मिक समयमा उनले गिरीबन्धु टी–इस्टेटको फाइल कहिले खोल्ने रु भन्दै गृहमन्त्री लामिछानेलाई अर्को प्रश्न गरे। मेलम्ची, वाइडबडी, फोरजीलगायत ठुला अनियमितताको फाइल कहिले खोल्ने भन्दै उनले गृहमन्त्रीमाथि प्रश्न बर्साए।
नेपाली काँग्रेस, नेकपा (एमाले), नेकपा (माओवादी) लगायत पुराना दलहरूले देश विकास गर्न नसकेको उनले आरोप लगाए।
पुरानाले सुशासन दिन र काम गर्न नसकेकाले नयाँ दलहरूलाई जनताले जिताएर पठाएको उनको तर्क थियो।
उनले गिरीबन्धु टी–इस्टेटबारेको सत्य तथ्य छानबिन गरेर सदनलाई जानकारी गराउन माग गरे। साथै कति पटक गृहमन्त्री फेरिँदा निर्मला पन्तको हत्यारा पक्राउ गर्ने भन्दै प्रश्न गरे।
उनले प्रधानमन्त्री पुष्पकमल दाहाल प्रचण्ड मुख्यमन्त्रीको हैसियतमा भारतीय प्रधानमन्त्री मोदीको शपथ ग्रहणमा गएको कि देशको प्रधानमन्त्रीको हैसियतमा भन्दै अर्को प्रश्न गरेका थिए।
Discussion about this post