विराटनगर । भोजपुरको रामप्रसाद राई गाउँपालिका–१ बैकुण्ठेका २६ वर्षीय सुन्दर राई ७ वर्षदेखि फरार थिए ।
प्रहरीको सर्वाधिक खोजी सूचीमा रहेका उनी पक्राउ भने परेका थिएनन् । प्रहरीलाई छलेर लुकिछिपी बस्दै आएका राई २०७३ साल असोज १९ गते राति ८ वर्षीया बालिकालाई बलात्कार गरेर फरार भएका हुन् । तर, बुधबार उनी प्रहरीको फन्दामा परे ।
भोजपुर प्रहरी प्रमुख डीएसपी सुदीपराज पाठकका अनुसार राईलाई लुकिछिपी बसेको अवस्थामा रामप्रसाद राई गाउँपालिका–१ ओख्रेबाट पक्राउ गरिएको हो । प्रहरीले चलाएको जबरजस्ती करणी मुद्दामा उनलाई भोजपुर अदालतले २०७९ माघ १८ गते दोषी ठहर गर्दै ५ वर्ष कैद सजायको फैसला गरेको थियो । तर, सजाय भुक्तान नगरिकन लामो समयदेखि फरार भइरहेका थिए ।
बालिकालाई बलात्कार गरेको जघन्य अपराधमा संलग्न उनी घटना भएको ७ वर्षपछि पक्राउ परेका हुन् । यसले अपराध गरेर भागेकाहरु जसरी पनि कानुनको दायरामा आउँछन् भन्ने तथ्य स्थापित गरेको छ । अपराधी जुनसुकै बेला पनि पक्राउ पर्छन् भन्ने सन्देश प्रवाह भएको छ ।
ठूलो मिहीनेत गरेर पक्राउ गरिएका राईलाई प्रहरीले बिहीबार अदालतमा पेस गर्ने तयारी गरेको छ । प्रहरीले बुझाएपछि उनलाई अदालतले कैद सजाय भुक्तानका लागि कारागार चलान गर्ने छ ।
भोजपुरकै साल्पासिलिछो गाउँपालिका–५ ९साविकको दोभाने गाविस–८० का अन्दाजी ६५ वर्षीय चक्रबहादुर राई तीन दशक अघिदेखि फरार थिए । कर्तव्य ज्यान मुद्दाका फरार प्रतिवादी उनी अपराधमा संलग्न भएको ३४ वर्षपछि गत असोज ५ गते पक्राउ परे ।
प्रहरीका अनुसार २०४६ साल कात्तिक १७ गते साविकको दोभाने–६ का २६ वर्षीय बद्रीकुमार राईको हत्या गरेर चक्रबहादुर फरार भएका हुन् । तर, लामो समयसम्म पक्राउ परेनन् । दोभाने–७ का तत्कालीन वडाध्यक्ष रामनाथ राईको घरमा सुतिरहेका बेला खुकुरीले शरीरका विभिन्न ठाउँमा हानेर बद्रीकुमारको हत्या गरिएको थियो ।
खुकुरीले उनको देब्रे हात छिनाउँदै उक्त हात नै लिएर चक्रबहादुर फरार भएका थिए । ३४ वर्षदेखि फरार रहेका उनलाई प्रहरीले सुनसरीको इटहरी उपमहानगरपालिका–१९ तरहराबाट पक्राउ गरेको हो । अदालतले उनलाई २०६० साल जेठ २७ गते सर्वस्वसहित जन्मकैदको फैसला गरेको थियो । प्रहरीले पक्राउ गरेर बुझाएपछि अदालतले कैद सजाय भुक्तानका लागि कारागार चलान गरेको छ ।
जघन्य अपराध गरेर भागेका उनी पक्राउ परेसँगै अपराधमा संलग्नले उन्मुक्ति पाउँदैनन् भन्ने पुष्टि भएको छ । अपराध अनुसन्धान, नियन्त्रण र कानुन कार्यान्वयनमा प्रहरीको भूमिकाप्रति सकारात्मक छाप बसेको छ । ठूला र जघन्य प्रकृतिका अपराधमा संलग्न लामो समयपछि भएपनि पक्राउ पर्नुले प्रहरीको काम कारबाही प्रभावकारी र प्रशंसनीय रहेको देखाउँछ ।
भोजपुर प्रहरीले पछिल्लो समय पुराना मुद्दाका फाइल केलाउँदै छ । विगतका घटनाको अध्ययन गरिरहेको प्रहरी जघन्य अपराधमा संलग्न भएर लामो समयदेखि भागिरहेकाहरुलाई धमाधम पक्राउ गर्न सफल भइरहेको छ । प्रहरीले पुराना मुद्दाको अध्ययन गरेर खोजी तीव्र पारेसँगै अपराधीहरु धमाधम पक्राउ पर्न थालेका हुन् ।
डीएसपी पाठकले भोजपुरमा ‘फरार प्रतिवादी पक्राउ विशेष अभियान’ चलाएका छन् । उनी जिल्ला प्रहरी प्रमुख भएर अढाई महिनाअघि मात्रै भोजपुर पुगेका हुन् । जिल्ला प्रहरीको नेतृत्व सम्हालेदेखि नै उनले विगतका अपराधको अध्ययन गर्दै अपराधमा संलग्नको खोजीलाई प्राथमिकतामा राखेका छन् । त्यसयता जघन्य अपराधमा संलग्न र धेरै वर्ष कैद भुक्तान गर्न बाँकी रहेका अपराधी धमाधम पक्राउ पर्न थालेका हुन् ।
डीएसपी पाठकको नेतृत्वमा विशेष अभियान चलेयता भोजपुरमा ४ जना फरार प्रतिवादी पक्राउ परिसकेका छन् । अदालतले दोषी ठहर गर्दै कैद र जरिवानाको फैसला गरेपनि प्रतिवादीहरु सजाय भुक्तान नगरिकन लामो समयदेखि भागिरहेका थिए । पुराना मुद्दा पल्टाएर फरार प्रतिवादी पक्राउलाई प्राथमिकतामा राखिएको पाठकले बताए ।
उनका अनुसार अपराधमा संलग्नहरु सजाय भुक्तान नगरिकन खुलेआम हिँडडुल गर्दा पीडितले न्यायको महसुस गर्न पाउँदैनन् । अपराधबाट पीडित भएले उल्टै समाजमा थप असुरक्षित भएर बस्नुपर्ने अवस्था आउँछ । ‘पीडितलाई न्याय दिन र सुरक्षित महसुस गराउन तथा कानुन कार्यान्वायन गर्न र अपराधीलाई कानुनको कठघरामा ल्याउन प्रहरी सक्रिय छ,’ डीएसपी पाठक भन्छन्, ‘गाउँघरमा अपराध गरेर भागेकाहरुका बारेमा जानकारी भए प्रहरीलाई सूचना दिएर सहयोग गर्न सबैमा आग्रह गर्छु ।’
अपराधीका बारेमा सूचना दिनेको सबै विवरण गोप्य राखिने उनको भनाइ छ । ‘कहीँकतैबाट जानकारी आउनसाथ पक्राउ गरेर प्रहरीले अपराधीलाई कानुनी कारबाहीको दायरामा ल्याउँछ,’ उनले भने, ‘तर, सूचना दिनेको विवरण अति नै गोप्य हुन्छ ।’
अपराधमा संलग्नलाई कानुनको दायरामा ल्याउँदा समाजमा शान्ति सुरक्षाको अवस्था मजवुत भएर प्रहरीप्रति जनविश्वाससमेत बढ्ने पाठक बताउँछन् । ‘अपराधी पक्राउ परेपछि पीडितले न्याय पाउँछन् । पीडकलाई कानुन अनुसार कारबाही हुन्छ,’ उनले भने, ‘समाजमा शान्ति सुरक्षा कायम गर्न सकिन्छ । अपराधरहित समाज निर्माणमा प्रहरीलाई सबैको साथ र सहयोग आवश्यक पर्छ ।’
समाजमा शान्ति सुरक्षा कायम राख्न, दण्डहिनताको अन्त्य गर्न, पीडितलाई न्याय दिन र अपराधीलाई पक्रेर कारबाही गर्न प्रहरीले कुनै कसर बाँकी नराख्ने डीएसपी पाठकको भनाइ छ । अपराधीलाई सजाय दिँदा अपराधरहित समाज निर्माणमा मद्धत पुग्ने उनले बताए ।
Discussion about this post