विराटनगर । मोरङको उर्लाबारीमा सहचालकले ट्रक चलाउँदा बिहीबार दिउँसो ठूलो दुर्घटना भएको छ ।
यद्यपि, ठूलो मानवीय क्षति हुनबाट भने जोगिएको छ । सवारी चालक अनुमतिपत्र (लाइसेन्स) प्राप्त नगरेका सहचालकले लापरबाहीपूर्ण तरिकाले चलाएको ट्रकले ठक्कर दिँदा एकैपटक ९ वटा सवारीसाधनमा क्षति पुगेको छ ।
दुर्घटनामा परेर २ जना घाइते भएका छन् । मोरङ प्रहरीका प्रवक्ता डीएसपी रन्जनकुमार दाहालका अनुसार दुर्घटना भएका बेला ट्रक इलामको फाकफोकथम गाउँपालिका–४ का २२ वर्षीय योगेन्द्र थापामगरले चलाएको खुलेको छ । प्रहरीले उनी ट्रकको सहचालक रहेको जनाएको छ । चालक नभएका बेला थापामगरले ट्रक चलाइएको प्रहरीको भनाइ छ ।
थापामगरसँग लाइसेन्ससमेत छैन । उत्तरबाट दक्षिणतर्फ आउँदै गरेको ना ३ ख ४०७८ नम्बरको ट्रकले उर्लाबारी नगरपालिका–५ मधुमल्ला रोडमा पार्किङ गरेर राखिएका सवारीसाधनहरुलाई दिउँसो २ः२० बजेतिर ठक्कर दिएको डीएसपी दाहालले बताए । ट्रकको ठक्करबाट ३ वटा अटो टेम्पो, ३ वटा मोटरसाइकल, २ वटा सीटी सफारी र एउटा पिकअप गाडीमा क्षति पुगेको छ । आफैं अनियन्त्रित बनेको ट्रकले सडकको छेउमा पार्किङ गरेर राखिएका सवारीसाधनलाई ठक्कर दिएको दाहालको भनाइ छ ।
ट्रकको ठक्करबाट को २ ह ४७२२, प्रदेश १–०२–००३ ह ३४०६ र प्रदेश १–०२–००३ ह २९४० नम्बरको अटो तथा प्रदेश १–०२–०५१ प ४४२२, मे ११ प १९९५ र प्रदेश १–०१–०१४ प ७४४३ नम्बरको मोटरसाइकल एवं प्रदेश १–०१–००२ ह २५५० र को १ ह ७६८५ नम्बरको सफारी तथा को २ च २३ नम्बरको पिकअपमा क्षति पुगेको छ । गिट्टी लोड गरिएको ट्रकले ठक्कर दिँदा केही सवारीसाधनमा पूर्णरूपले क्षति पुगेको छ । केहीमा आंशिक क्षति पुगेको प्रहरीले जनाएको छ ।
दुर्घटनामा दुईवटा अटोका चालक घाइते भएका छन् । डीएसपी दाहालका अनुसार २९४० नम्बरको अटोका चालक उर्लाबारी–१ का ४० वर्षीय दिलकुमार बोहोरा र ४७२२ नम्बरको अटोका चालक उर्लाबारी–६ का ४२ वर्षीय पदमप्रसाद भट्टराई घाइते भएका हुन् । सामान्य अवस्थाका उनीहरुको उर्लाबारीस्थित अरनिको अस्पतालमा उपचार भइरहेको दाहालले बताए । आफूलाई ट्रकको चालक बताउने सुनील शंकर दुर्घटनालगत्तै प्रहरीको सम्पर्कमा पुगेका छन् ।
उनी ट्रकका सक्कली चालक हुन् कि हैनन् भन्ने पुष्टि भइसकेको छैन । दुर्घटनापछि ट्रक धनीले चालक खडा गरेर उनलाई ल्याइएको पनि हुनसक्ने प्रहरीको आशंका छ । यद्यपि, अनुसन्धानपछि यो विषय यकिन हुने छ । शंकरले भने सहचालकले आफूखुसी चाबी लगेर ट्रक चलाउँदा दुर्घटना भएको बताएका छन् ।
प्रहरी स्रोतका अनुसार सहचालक थापामगर भने आफूले चालकसँग अनुमति लिएर नै ट्रक चलाएको बताउँछन् । अचानक सडक पार गरेको मोटरसाइकललाई जोगाउने क्रममा दुर्घटना भएको उनले प्रहरीलाई बताएका छन् । ट्रक र सहचालक थापामगर तथा ट्रकको ठक्करबाट क्षति पुगेका सवारीसाधनलाई प्रहरीले नियन्त्रणमा लिएर घटनाको अनुसन्धान थालेको छ ।
इलाका प्रहरी कार्यालय उर्लाबारीका इन्सपेक्टर देवेन्द्र दास नेतृत्वको टोलीले घटनाको अनुसन्धान सुरु गरेको हो । घटनासँग सम्बन्धित अन्य विषय अनुसन्धानपछि यकिन हुने प्रहरीको भनाइ छ ।
Discussion about this post