ताप्लेजुङ / तमोर नदी सहितका खोलामा लगाइएको अस्थायी काठे पुल बाढीले बगाउँदा यातायात सेवा अवरुद्ध बनेको छ ।
बुधवार राती देखी परेको वर्षासँगै तमोर नदी, सिँसावा खोला र सिस्ने खोलामा आएको बाढीले विभिन्न पाँच ठाउँमा रहेको काठे पुल (गाडी गुड्ने काठको पुल) बगाएपछि यातायात सेवा अवरुद्ध भएको हो ।
जिल्लाको फक्ताङ्लुङ गाउँपालिकास्थित तमोर नदीको छिरुवा र तापे थोक बगरमा रहेको अस्थायी काठे पुल बाढीले बगाएको छ ।
यस्तै तापेथोकस्थित सिँसावा खोला तथा फुङ्लिङ नगरपालिका–१० फुरुम्बु र फक्ताङ्लुङ गाउँपालिका–३ लिङ्खिमको सिमाना भई बग्ने सिस्ने खोलामा रहेको दुई वटा काठे पुल बाढीले बगाएको छ ।
उक्त पुलहरु बाढीले बगाएपछि फक्ताङ्लुङ गाउँपालिका–३ लिङ्खिम, वडा ४ इखाबु, वडा ५ तापे थोक, वडा ६ लेलेप र वडा ७ ओलाङ्चुङगोलामा यातायात सेवा पूर्ण रुपमा अवरुद्ध भएको छ ।
फक्ताङ्लुङ गाउँपालिकाका अध्यक्ष राजन लिम्बू (मुक्ति) का अनुसार बाढीले काठे पुल बगाउँदा र ठाउँ–ठाउँको सडक खण्डमा पहिरो गएका कारण यातायात सेवा अवरुद्ध बनेको हो ।
खाम्लुङको दोभान, सदरमुकाम फुङ्लिङ हुँदै फक्ताङ्लुङ गाउँपालिका प्रवेश गर्ने तमोर कोरिडोर र फुङ्लिङ, सुकेटार, फुरुम्बु हुँदै लिङ्खिम जोड्ने मेची राजमार्गमा यातायात सेवा अवरुद्ध भएको अध्यक्ष लिम्बूले जानकारी दिए ।
यस्तै विभिन्न वडामा रहेका ग्रामीण सडकहरू पनि अवरुद्ध भएको छ ।
त्यस्तै मिक्वाखोला गाउँपालिका–१ खोक्लिङको शान्तिचौकस्थित भस्मे खोलामा आएको बाढी र वडा ३ लिबाङको चिहान डाँडामा गएको पहिरोले भित्री सडकहरू अवरुद्ध बनेको प्रहरीले जनाएको छ ।
जिल्ला प्रहरी कार्यालय ताप्लेजुङका सूचना अधिकारी एवम् प्रहरी निरीक्षक कमलकुमार लुङगेलीका अनुसार फुरुम्बु र लिङ्खिम जोड्ने सिस्ने खोलामा रहेको एक झोलुङ्गे पुलसमेत बाढीले बगाएको छ ।
जिल्लामा बाढी पहिरोले पु¥याएको क्षतिको विवरण सङ्कलनको काम जारी छ ।
Discussion about this post