विराटनगर । माेरङमा एम्बुलेन्सकाे ठक्करबाट मृत्यु भएका पुरुषकाे पहिचान खुल्न सकिरहेकाे छैन ।
इलाका प्रहरी कार्यालय पथरीका डीएसपी गणेशबहादुर श्रेष्ठका अनुसार पूर्व-पश्चिम राजमार्गअन्तर्गत माेरङकाे पथरीशनिश्चरे नगरपालिका- १ मा एम्बुलेसले ठक्कर दिँदा घाइते भएका पैदलयात्री पुरुषकाे उपचारका क्रममा मृत्यु भएकाे हाे । तर, दुर्घटनामा पर्नेकाे सनाखत भाेलिपल्टसम्म हुन सकेकाे छैन ।
बिरामी बाेकेर झापाबाट विराटनगरतर्फ आउँदै गरेको मे १ च १६५६ नम्बरकाे एम्बुलेन्सले आइतबार राति ९:१५ बजेतिर ठक्कर दिँदा अन्दाजी २५-२६ वर्षीय पुरुष गम्भीर घाइते भएका थिए । विराटनगरको नाेबेल शिक्षण अस्पतालमा साेमबार दिउँसाे ४:२० बजेतिर उनकाे मृत्यु भएकाे डीएसपी श्रेष्ठले बताए । उनका अनुसार मृतककाे पहिचान खुल्न बाँकी रहेकाले परिवार वा आफन्तलाई शव बुझाउन पाइएको छैन ।
साथबाट परिचय खुल्ने कुनै कागजात फेला नपरेकाे र चिनजानका काेहीपनि हालसम्म सम्पर्कमा नआएकाे डीएसपी श्रेष्ठले बताए । उनका अनुसार मृतककाे दाहिने तर्फकाे आँखा छैन । घटनाकाे अनुसन्धान सुरु गरेर मृतककाे पहिचानकाे प्रयास भइरहेकाे उनले बताए ।
प्रहरीका अनुसार सडक पार गर्दै गरेका पैदलयात्रीलाई एम्बुलेन्सले ठक्कर दिएकाे थियाे । त्यसपछि अनियन्त्रित बनेकाे एम्बुलेन्सले प्रदेश १-०३-००१ -प ५३८८ नम्बरको माेटरसाइकललाई समेत ठक्कर दियाे ।
दुर्घटनामा माेटरसाइकल चालक इलामकाे इलाम नगरपालिका- ५ का ३५ वर्षीय दावा शेर्पा घाइते भएका थिए । सामान्य अवस्थाका उनलाई उपचारका लागि पथरी अस्पताल भर्ना गरिएकाे थियाे । प्रहरीले एम्बुलेन्स चालक इलामकाे माई नगरपालिका- ४ का ५० वर्षीय विष्णुभक्त लिम्बूलाई पक्राउ गरेर घटनाको अनुसन्धान सुरु गरेकाे छ । दुवै सवारीसाधनलाई प्रहरीले आफ्नाे नियन्त्रणमा राखेकाे छ ।
Discussion about this post